حزر فزر................. فين الحل

حزر فزر................. فين الحل

مشاكلنا ما بقاش لها حد .. عايزين همَّة وشغل بجد


ومواردنا أهي فوق العد .. بس علينا نشوف الحل

لو يائس وبعت شكاوي .. وحقوقك وَقَفتها رشاوي

ووسايط وغُلُبْنا نداوي .. بالذمَّة إيه يبقي الحل

ليه الرشوة بقي لها زباين .. والوزارات بقي فيها الخاين

واللي مكدب ييجي يعاين .. طب إيه بقى هيكون الحل

أعمالنا محتاجة ضمير .. والناس زهقت م التزوير

فكَّر بقى وبعقل كبير .. وهتعرف إيه هوَّ الحل

عايزين شورى معاها العدل .. تِظهِر أهل الخير والفضل

وبالتضحية دايمًا والبذل .. نكون قرَّبنا لأحسن حل

عايزين وحدة وعايزين قوة .. ويبقي شبابنا كلُّه فتوة

وتِعلا بلادنا بره وجوه .. وده يضمنه لنا أحسن حل

لو عاوزين نفلح في زراعة .. أو عاوزين نسبق في صناعة

ما نقصنا غير ثقة وشجاعة .. وإدارة تعرف إيه الحل

لو عاوزين البركة تزيد .. يلَّلا نحط الإيد ف الإيد

هِمَّة قوية وعزم حديد .. رأيك إيه بقى يبقي الحل

لو عاوزين مسئول مهتم .. يفدي بلاده بالروح والدم

يلَّلا معايا وقولِّي يا عم .. شايف إيه بقى يبقي الحل

راح نصبر وطريقنا طويل .. شعبنا صابر ماله مثيل

مش هنخاف ولا فينا ذليل .. ده إحنا معانا أحسن حل

لو بصيت ف تاريخ أجدادنا .. وطالعت ف أسباب أمجادنا

وحبيت تنقل ده لأولادنا .. ما في غيره هتختاره كحل

لو ضعف الأخلاق غيَّرنا .. لو ظلم ونفاق أخَّرنا

يلَّلا بسرعة قوام دبَّرنا .. إيه ممكن هيكون الحل

خنقتنا حياتنا المادية .. وهاجمتنا تقاليع غربية

نرجع بقى للأصل شوية .. طيب إيه بقى يبقي الحل

وشبابنا محتاج له هوية .. محتاج عزم ونفس أبية

يِرجَّع لينا مصر فتية .. شايفين طيب فين الحل

وشبابنا عايز الحرية .. يِبدع، يِثبت همة قوية

كفاياه قاسى من العبودية .. شايفين إيه بقي هو الحل

أعمالنا عايزة الإتقان .. علم وصنعة مع الإحسان

ومصر تسبق زي زمان .. إيه ممكن بقى شايفه الحل

ليه بنبيع للغرب بلادنا .. ليه نفرط في حقوق أولادنا

كرامتنا زادنا وزُوَّادنا .. وده طبعًا مذكور في الحلل

وعاوزين قيادات مسئولة .. مش عايزين خصخصة وعمولة

دي بقت حاجة مهيش معقولة .. طب بقي إيه هيكون الحل

وبلادنا خيراتها وفيرة .. وشبابها وسواعدها كثيرة

ما ناقصها إلا إدارة خبيرة .. تِخْلِص وتدور ع الحل

حكم الفرد تعبنا كثير .. والاستبداد ده أمره خطير

عايزين بقى شورى وتدبير .. طيِّب ليه تايهين ع الحل

شوارعنا محتاجة أمان .. ترجع حلوة زي زمان

فيها الرحمة والاطمئنان .. رأيك إيه بقى هو الحل

فين الروح الحلوة زمان .. كات تجمع كل الخلان

تشوف البسمة مع اطمئنان .. قولي بقي إيه هو الحل

قبطي ومسلم همَّا كمان .. بر وقسط مع الإحسان

وجدوا الوحدة في خير وأمان وبيظللهم أحسن حل

لو فيه صحفي بيكتب كلمة .. وبيكتبها بحكمة وذمة

ينوي بها الإخلاص للأمة .. يبقى أكيد ده عرف الحل

لو فيه حد رجل أعمال .. كون قرشه بسكة حلال

يبني يعمَّر للأجيال .. يبقى أكيد ده عرف الحل

لو فيه حد مِ الحكام .. يرعى في شعبه الصالح العام

عدل وشورى وكله تمام .. ما هوَّ ده قصدنا بالحل

لو تلقى موظف مسئول .. ينجز شغله كده على طول

أكثر من حقه ما بينول .. يلقى الخير قدامه في الحل

لو قاضي بيفصل في قضية .. ويقول حكمه بأصدق نية

لا يخاف من راعي ولا رعية .. ما هوَّه ده مضمون الحل

يا مصري يلَّلا ارفع راسك .. صلَّح بلدك وانصر ناسك

وبصوتك اثبت إخلاصك .. وبكده تبقى عرفت الحل

متقولشي دا الحلم بعيد .. والظلم ده عاتي وعنيد

حاول هايجيك التأييد .. وهتسعد لو تلقى الحل

مين هيصون العهد الغالي .. ومين هيقول دايمًا وأنا مالي

يللا سوا نخطط للعالي .. ده إحنا معانا أحسن حل

مش عايز أطول وكفاية .. يلَّلا نضحي لأحسن غاية

ونتمسك وأديكو معايا سوا مع بعض عرفنا الحل

----------

يا سلام يا محمود موضوع جيد فعلا