احنا الجيل اللي اتفتح وعيه علي سينما الاطفال يوم الجمعة الساعة 10 الصبح..
احنا الجيل اللي درسّوله ان الفلسطينيين قبضوا ثمن اراضيهم من الصهاينة ذهبا و نساء..
احنا الجيل اللي درس في التاريخ ان السادات -الرئيس المؤمن-هو اللي افتتح السد العالي..
احنا الجيل اللي لم يسمع في حياته سوي خطابات مبارك المملة و المملّ..
احنا الجيل اللي كان بيعتقد ان افضل من يخلف مبارك هو"ابو غزالة"او "الجنزوري"او "موسي"..!
احنا الجيل اللي لعلع فيه الكائن محمد ثروت بأغانيه في عيد الشرطة و حفلات تخرج الكلية الحربية..
احنا الجيل اللي بعد ما كبر عرف ان فيه بني ادمين بجد بتغني مش"بت.."..
احنا اخر قطفة من الجيل اللي اتربي علي اهمية التفوق في التعليم مش علشان نفسه قدّ ما هو علشان نكون خبر حلو في مرار ايام الاب والام..
احنا الجيل اللي قرف من ضعف انتصاب الاحزاب السياسية في مواجهة الوطني..
احنا الجيل اللي اتخنق من حساب المستقبل بالمازورة و السانتي متر..
احنا الجيل اللي اول ما قال يا قراية بدأ بمكتبة الاسرة ايام ما كانت بتنشر لكتّاب بجد..
احنا الجيل اللي لما كبر شوية عرف طريق سور الازبكية و بعدين شراء الكتب بالقسط و علي ما تفرج من عمر قناوي و عمر بوك ستور..
احنا الجيل اللي قدر يخض الدولة و يوقفها علي رجل بكام كليكاية عبيطة علي الماوس..
احنا الجيل اللي شل ّالجيزة بمظاهرة لم تتم قدام قسم العمرانية..
احنا الجيل اللي استحمل رؤساء تحرير من عينة ممتاز"الاوطّ"و اسامة"سراية"و خالد امام..
احنا الجيلاللي كان لسه عيّل في التسعينات بكل شللها و ركودها السياسي الواصل لحد الملل..
..
....أيوة احنا جيل فرحان بنفسه لدرجة الفشخرة
احنا الجايين..احنا اللي هانخلق مستقبلنا بايدينا ع الارض خطوة خطوة لكن بثبات مشوب بنزق ثوري و طفولي!
احنا الجايين و بكرة تشوفوا
موضوع: احنا الجيل 
الأربعاء يوليو 30, 2008 2:56 pm
